oleh

Carilah Bini Sepadan

PAKAM nian pesan Wak Barab dan Wak Uban dengan anak ujunye becerite sambil nunggu pulauan duren, cempedak dan duku bulan kemaren.
Die bepesan jadi jantan tu jangan letoi, jangan mudah marajok, jadi jantan tu harus kuat, harus tanggung jawab karne bakal jadi kepala rumah tangge.
“Jadi jantantu tu harus punye tanggung jawab, karne kapan lah bebini kagek nak ngidupi anak urang. Begawetu rajin – rajin. Carilah bini yang sepadan, kagektu,” pesan Wak Barab dengan anak ujunye.
Setuju nian Wak Uban nengarnye. “Iye Jang, kagek kapanlah bebini, bakal ngidupi anak urang, kapan lah beranak ngidupi anak, melisusu, meli promina, banyak yang dibeli,” uji Wak Uban sambil melah duren di atas pondok.
Diacungi jempol oleh wak Barab. ” Mencari bini tu, kalu pacak cari yang galak bangun pagi, rajin, setia dengan keluarga, jangan cari bini, penyegan, tidok kesiangan, gaya tinggi, agek sare dewek, pecarian tak besak bini besak gengsi nah rengke idup laju,” timpal Wak Barab sambil ngisap GP sudah makan duren.
Akor nian due bekanti ni becerite. “Jaman mak ni ari, biaya idup tinggi, banyak betine selera tinggi, kapan bebunyi nak hp android oppo, samsung, soomi, begawe gaji kecik, nak tidok megang hp,  bangun tidok megang hp, kapan lagi masak untuk laki,” uji wak Uban.
Laju wak Barab merek saran. “Carilah bini, yang biase idup sederhana, setia dengan keluarga, galak begawe, galak ngurusi rumah tangge, jangan nian mencari bini, selera tinggi, nak begaya terus, kapan bebunyi nak shoping, nak liburan, amon hasil kecik selera tinggi tedudok jang kite,” kelakar wak Uban.
Wak Barab nimpal omongan wak Uban. “Kalu dapat bini, tak pernah ke kebon, tak pernah megang parang, tak pernah merumput, ansap nian, maklum selame gades idup lemak. Betine mak tu, ade pasangannye nian, die nak selevel, bukan pasangan kite Jang, harge sempaknye be sikok ratusan ribu, harge sempak kite tige sepuloh ribu, hahaha,” simbat wak Barab.
Tetawe wak Uban nengarnye. “Benar nian Jang. Carilah bini sepadan, galak belaok iwak asin, sambal petai, lalap jering, urang dusun. Tapi kalu kau kagek kau sukses, banyak duet, gaji besak, teserah kau, nak mencari urang belande, urang inggris, tak ape-ape,” uji Wak Uban. (Mang Mukri)
BACA JUGA :  Usai Vaksin Dapat Minyak Goreng

Komentar

Tinggalkan Balasan

Alamat email Anda tidak akan dipublikasikan.

Berita Lain-nya