oleh

Ngadali Buaye

WAK Barab dapat telepone dari urang tak dikenal, gayanye mak kenal nian dengan Wak Barab padahal ade kendak laen. Nah Wak, lanjakelah.

Nengar telepone berdering langsung diangkat Wak Barab, si penelepone ngomong disimpan dak nomor ini. Kenal dak dengan suare penelepon. Terang bae Wak Barab tak kenal.

Lah  becerite panjang libar urang tu, nak mudike Wak Barab. “Tolong teleponnye jangan dimatike, agak minggir jangan sampe tedengar yang lain,” uji si penelepon sambil nak ngatur Wak Barab.

Langsung bingsal Wak Barab nengar omongan urang tu. “Ngape kau nak ngatur aku, kau nipu ye. Salah sasaran kalu kau nak ngadali buaye, kecik urusannye. Kau telepon urang laen bae, jangan nak saling kijangi,” komentar Wak Barab.

Rupenye si penelepon dak paham maksud Wak Barab masih ngoceh terus dak berhenti. “Uy kanti, dak profesional kau tu ngomong, kalu nak mudike jangan kasar nian, belajar dulu dengan aku. Syaratnye siapke ayam itam, keris kecik, untuk ngisi ilmu kau tu. Wak ni dak mempan  nak kau tipu, kau tu maseh yunior, belajar dulu dengan senior, baru terjun ke gelanggang,” saran Wak Barab.

Langsung dijawab pelaku sambil ngomong lambat. “Ai cacam wak, hebat nian kamu tu, jangan-jangan pernah dikeroyok urang se kampung,” uji pelaku sambil matike teleponnye.

“Nak mati nian, urangtu, tak mada’i jeruk nak minum jeruk, yunior nak ngolake senior. Buaye nak dikolake kadal, nak sare,” rutuk Wak Barab dewek sambil tersenyum.

Rupenye suare Wak Barab tedengar oleh Wak Uban. “Lanjakelah kanti, jangan diberek sela ngomong, itu gawe urang tak belekap, cuma nak kudiketula, kapan bebunyi nak nolong, palak baeknye nian, Mak kite dianggapnye buye be,” ujinwak uban awak ni memang katek kepintaran.(mang mukri)

Komentar

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Berita Lain-nya